İki ölkə arasında inkişaf edən münasibətlərin əsasını qarşılıqlı faydaya söykənən iqtisadi əməkdaşlıq təşkil edir

İki ölkə arasında inkişaf edən münasibətlərin əsasını qarşılıqlı faydaya söykənən iqtisadi əməkdaşlıq təşkil edir
Tarix: 15-07-2026 | Saat: 16:34
Bölmə:Siyasət | çapa göndər

Şirift ölçüsü:

Müzəffər dövlət başçısı cənab İlham Əliyevin rəhbərliyi ilə Azərbaycan bu gün öz tarixinin ən qüdrətli, ən dinamik və şərəfli inkişaf dövrünü yaşayır. Cənab Prezidentin qətiyyətli liderliyi, sarsılmaz iradəsi və uzaqgörən xarici siyasət strategiyası ölkəmizi regional gücdən qlobal arenada söz sahibi olan, etibarlı və böyük nüfuza malik tərəfdaşa çevirmişdir. İşğaldan azad edilmiş qədim torpaqlarımızda həyata keçirilən nəhəng quruculuq işləri və beynəlxalq miqyaslı diplomatik uğurlar məhz cənab Prezidentin müdrik dövlətçilik xəttinin, sülh və tərəqqiyə xidmət edən müstəqil siyasətinin bariz bəhrəsidir. Bu milli maraqlara əsaslanan uzaqgörən siyasətin növbəti mühüm və tarixi təzahürü olaraq, Azərbaycan Respublikasının Prezidenti cənab İlham Əliyev və ölkəmizə rəsmi səfərə gələn Slovakiya Respublikasının Prezidenti Peter Pelleqrinini qəbul etmiş, tərəflər Şuşada mətbuata bəyanatlarla çıxış edərək iki ölkə arasındakı əlaqələrin gələcək inkişaf perspektivlərini və azad edilmiş ərazilərimizdə baş tutan birgə quruculuq layihələrini bütün dünyaya bəyan etmişlər.

Cənab Prezident İlham Əliyevin bəyanatında iki ölkə arasındakı yüksək səviyyəli siyasi əlaqələr və Slovakiyanın azad edilmiş ərazilərdə, xüsusən də Ağdamın Baş Qərvənd kəndində həyata keçirdiyi yenidənqurma işləri xüsusi yer alıb.
Dövlətimizin başçısı Azərbaycan ilə Slovakiya arasındakı ikitərəfli münasibətlərin hazırkı durumunu yüksək qiymətləndirərək, siyasi dialoqumuzun çox fəal olduğunu və bundan sonra da Azərbaycan-Slovakiya münasibətlərinin yüksələn xətlə inkişaf edəcəyinə əminliyini ifadə etdi. Bu bəyanat, rəsmi Bakının Slovakiya ilə qurulan strateji tərəfdaşlığa verdiyi xüsusi önəmi və bu əlaqələrin uzunmüddətli perspektivini bir daha təsdiq edir.

Dövlət başçısının bəyanatında ən mühüm və praktiki məqamlardan biri slovakiyalı tərəfdaşların Ağdam rayonunun Baş Qərvənd kəndində həyata keçirdiyi irimiqyaslı layihədən məmnunluq ifadəsi oldu. Cənab Prezident İlham Əliyev slovakiyalı tərəfdaşların bu fəallığını yüksək qiymətləndirərək "Biz çox şadıq ki, Slovakiya Qarabağın bərpasında fəal iştirak edir" deyə vurğuladı. Slovak şirkətlərinin iştirakı ilə Baş Qərvənd kəndində "Ağıllı kənd" (Smart Village) konsepsiyası əsasında aparılan yenidənqurma işləri, Avropanın müasir şəhərsalma və "yaşıl enerji" texnologiyalarının Qarabağa gətirilməsinin bariz nümunəsidir. Layihə çərçivəsində yüzlərlə fərdi evin inşası, müasir infrastrukturun qurulması və ekoloji standartların tətbiqi nəzərdə tutulur.

Bəyanatda həmçinin iki xalqın bir-birinə yaxınlaşması və bu əməkdaşlığın gələcək rəmzləri də ön plana çəkildi. Baş Qərvənd kəndində inşa ediləcək və Slovakiya dövlətinin dəstəyi ilə ərsəyə gələcək müasir məktəb binasına Slovakiyanın milli qəhrəmanı Milan Rastislav Ştefanikin adının verilməsi bu dostluq əlaqələrini daha da mənəviləşdirir.

Azərbaycan Prezidenti cənab İlham Əliyevə məxsus bəyanatdan aydın görünür ki, iki ölkə arasındakı münasibətlər sadəcə rəsmi protokollardan ibarət deyil. Slovakiya Qarabağda — dağıdılmış yurd yerlərimizdə həyata keçirdiyi konkret və irimiqyaslı layihələrlə Azərbaycanın yanında olduğunu, gələcək inkişaf və quruculuq prosesinə real töhfə verdiyini əyani şəkildə nümayiş etdirir.

Xüsusi vurğulamaq lazımdır ki, Şuşadan ucalan bu səmimi və qətiyyətli bəyanatlar, cənab Prezident İlham Əliyevin uzaqgörən xarici siyasətinin və milli maraqlara əsaslanan beynəlxalq tərəfdaşlıq strategiyasının növbəti tarixi qələbəsidir. Məhz cənab Prezidentin müdrik rəhbərliyi və yüksək diplomatik məharəti sayəsində Qarabağın dağıdılmış yurd yerlərində beynəlxalq tərəfdaşlarla birlikdə həyata keçirilən nəhəng bərpa işləri, müasir Azərbaycanın qüdrətini və sarsılmaz dövlətçilik xəttini bütün dünyaya nümayiş etdirir. Slovakiya ilə qurulan bu möhkəm dostluq körpüsü cənab Prezidentin qətiyyətli siyasəti altında Azərbaycanın gələcəyə doğru inamla irəliləyən sülh, tərəqqi və əməkdaşlıq mərkəzi olduğunu bir daha sübut edir.

İlqar Kərimov,
YAP Tovuz Rayon Təşkilatının sədr müavini

Ad və soyad:*
E-Mail:
Şərhiniz:
Kodu yazın: *