Azərbaycan xalqı və dövləti heç vaxt işğalla barışmamışdır

Azərbaycan xalqı və dövləti heç vaxt işğalla barışmamışdır
Tarix: 09-07-2025 | Saat: 18:01
Bölmə:Siyasət | çapa göndər

Şirift ölçüsü:

1990-cı illərin əvvəllərində Ermənistanın Azərbaycana qarşı başladığı hərbi təcavüz nəticəsində ölkəmizin ərazisinin 20 faizi – Qarabağ və ətraf yeddi rayon – işğal olundu. Bu işğal təkcə torpaqların deyil, eyni zamanda minlərlə günahsız insanın həyatının, yurd-yuvasının və tarixi-mədəni irsimizin itirilməsi demək idi. Lakin Azərbaycan xalqı və dövləti heç vaxt bu işğalla barışmadı. Əksinə, 30 il ərzində həm dövlət səviyyəsində, həm də xalq iradəsi ilə bu haqsızlığa qarşı davamlı mübarizə aparıldı. Azərbaycan dövləti işğalın ilk günlərindən beynəlxalq təşkilatlar qarşısında bu məsələni qaldırdı. BMT Təhlükəsizlik Şurasının 4 qətnaməsi (822, 853, 874 və 884 saylı) Ermənistan qoşunlarının Azərbaycan ərazilərindən dərhal və qeyd-şərtsiz çıxarılmasını tələb etsə də, bu sənədlər uzun illər ərzində kağız üzərində qaldı. Lakin Azərbaycan öz diplomatik xəttindən dönmədi, beynəlxalq hüququn tələblərinə əsaslanaraq prinsipial mövqeyini qorudu. Eyni zamanda ölkə daxilində milli birliyə, hərbi güclənməyə və siyasi sabitliyə önəm verildi. Ümummilli lider Heydər Əliyev və daha sonra Prezident İlham Əliyevin rəhbərliyi ilə dövlət quruculuğu, ordu modernləşməsi və iqtisadi inkişaf istiqamətində ardıcıl islahatlar həyata keçirildi. Bütün bunlar Azərbaycanın bir gün torpaqlarını azad edəcəyi inamını yaşatdı və bu inam xalq arasında heç vaxt sarsılmadı. İşğalla barışmamaq yalnız siyasi ritorika deyildi – bu, milyonlarla azərbaycanlının gündəlik həyatına hopmuş milli məsələ idi. Məcburi köçkünlərin çətin şəraitdə olsa da, doğma yurdlarına qayıdacağına inamı, məktəblərdə Qarabağla bağlı öyrədilən dərslər, medianın və ədəbiyyatın daim bu mövzunu yaşatması xalqın yaddaşında bu torpaqların tərk edilmədiyini sübut edirdi. Əsgər analarının dualarında, uşaqların gələcəyə ümidlərində, veteranların xatirələrində Qarabağ və işğal olunmuş ərazilər daim canlı idi. Bu mübarizə təkcə silahla deyil, ruhla da aparılırdı. Çünki Azərbaycan xalqı üçün torpaq müqəddəsdir və bu müqəddəslik üzərində hər hansı güzəşt mümkün deyil. 2020-ci ilin payızında Azərbaycan Silahlı Qüvvələri 44 günlük Vətən Müharibəsi nəticəsində işğala son qoydu. Prezident İlham Əliyevin qətiyyətli rəhbərliyi, Azərbaycan Ordusunun gücü və xalqın birliyi nəticəsində Ermənistan məğlub edildi. Bu zəfər təkcə hərbi uğur deyil, eyni zamanda Azərbaycan xalqının 30 illik barışmaz mövqeyinin və əzminin təntənəsi idi. Şuşanın azadlığı ilə başa çatan bu müharibə göstərdi ki, Azərbaycan heç vaxt torpaqlarından əl çəkməyib. İşğalla barışmamaq sadəcə bir fikir deyil, dövlət və xalqın illər boyu davam edən prinsipial və möhkəm duruşudur. İşğaldan azad edilən ərazilərdə bu gün genişmiqyaslı bərpa və yenidənqurma işləri aparılır. “Böyük Qayıdış” proqramı çərçivəsində keçmiş köçkünlər artıq doğma torpaqlarına dönür, şəhərlər və kəndlər bərpa olunur. Bu, bir daha sübut edir ki, Azərbaycan xalqı yalnız torpağını geri qaytarmayıb, həm də həyatını, gələcəyini və tarixini yenidən qurur.

İlqar İlyasov
YAP Laçın rayon təşkilatının sədri

Ad və soyad:*
E-Mail:
Şərhiniz:
Kodu yazın: *